人生第一次~~面試 [14個月18日]

人生另一個第一次了~~ 就是pre-nursury面試!!

我就若無其事啦, 爸爸媽媽就有啲啲緊張 禮多人不怪, 前一晚喺櫃桶底搵番件suit出來試... 爸爸的西褲仍然啱著, 媽媽則驚訝點解係7碼嘅?!?!...... 趕吾切買, 唯有格硬著...

早上坐的士時, 爸爸和媽媽仍在互相禮讓~~"你in啦!!" "妳in啦!!" "妳in好啲" "你熟書啲"....
8時45分的士到達九龍塘啟思門口...
嘩?!?! 明明interview信約好9點, 點解仍要排大隊???
門口的職員叫一位家長先帶小朋友去戶外的操場玩玩, 另一位家長排隊比錢.
咁多人, 位位$30大洋 都幾好賺噃!!

爸爸比完錢剛好9時, 不知不覺間我落在爸爸手上, 就由爸爸陪我進入面試場...
面試場係一個很嘈的活動室, 氣氛就好似sam sir的動感運動室, 聲音好散亂&disturbing, 有很多玩具, 室內大約容納8位小朋友和8個家長, 不停流水作業的出入, 老師呢, 則有2至3位.

我一進場便感覺好嘈, 心情已經麻麻地, 拿起了一個"牛油果"來shake shake, 見悶悶地便執其他玩具玩, lego, 彈琴, 生果... 玩呀玩...
過了約15分鐘, 終於有位姐姐過來招呼我
"妍智, 你好嗎?"
我吾理.
"可吾可以握手呀?"
我吾理.
"give me five?"
終於撃了一掌!!

姐姐攞起了我剛剛棄掉的"牛油果"喺我面前shake shake, 我無興趣理.
"比你玩吖?" 我繼續吾理, 連眼神接觸都無, 繼續玩手上的電話...
個電話有好多粒制, 我好努力按, 但同屋企的吾同, 我按吾到出聲, 面容開始變得蚊蚊地

姐姐問爸爸: "識講野未呀?"
"佢識講好多野呀! xx, yy, zz ...." 爸爸盡量晒冷...
"雙音字都識架, 好似baby, good morning, 姑媽, yy, zz....." 爸爸盡量晒冷...
"平時邊個湊多啲?"
"工人姐姐" 這個時候爸爸只想我盡快脫離部電話, 忘記了sell下自已有involve好多時間比囡囡... 
爸爸引導: "妍妍, 不如炒餸吖"
我見炒餸咁吸引, 轉移目標... 炒呀炒...
跟住我指住要炒左邊小朋友既玩具, 大聲"ng", 又指住右邊小朋友既玩具, 再大聲"ng"
"佢都有要求喎!"
爸爸~ ~ ~ "係~ 呀~~"
我用匙炒起了件玩具, 主動申手比隔離個小朋友食.
"比我食得吾得呀?"
於是我炒起隻匙比姐姐食, 爸爸這個時候松一口氣了

"如果上午班滿晒, 會考慮下午班嗎?"
"都可以"

姐姐向我say "bye bye"
我眼定定望住佢
"比姐姐抱下得吾得?"
我申了雙手, 欲向前傾.. 都係吾好, 縮沙!!
爸爸補飛 "同姐姐kiss bye好吾好?"
我便飛出一個加分的香吻!!

整個面過程約10分鐘.... 爸爸向媽媽滙報我的表現~劣

跟住, 9時半有家長會, 校懂講下教學理念, 爸爸好認同, 好想可以入到這間學校... 可惜100個N1位一共有1700份申請, 17爭1...  真係好微噢!!

唯有等一個星期, 看有沒有奇蹟吧!!

爸爸自我攰勵, 當攞經驗吧!!