Tiffany's Blog: 1月 2012

2012年1月23日星期一

馬不停蹄的農曆年假 [3歲5個月]

妍妍農曆年假由19號開始, 妍妍和爸媽忙過不停...

19/1 年廿六 :
見家長 - 妍妍弱項主要是自我情緒控制, 不接受失敗, 行樓梯差; 讚的是學習專注, 有調理.
好興幸今年的老師比上年PN的, 真真正正的清楚妍智, 佢講的都是一矢中的, 而且能很有經驗和耐性地建議父母幫小朋友的方法, 真的很欣賞miss wong.
希望來年妍妍能Keep住好的東西, 情緒控制暫時是最令我們一家頭痛的事, 希望她漸漸長大, 漸漸地控制得好些.
評估報告做得很精美, 還夾有幾張相片是妍妍上課時的情況:

晚上跟爺爺嫲嫲姑媽家人吃團年飯

20/1 年廿七 :
要和最後的"晴天"接觸接觸, 操fit定身體, 準備和寒假搏鬥

! 爹娘專程請假帶女去行山-嘉道理農場, 同行的有carson和rebecca姨姨.

21/1 年廿八 :
打理完塊田出左尖東晚飯, 之後去旺角行花巿, 讓妍妍感受一下花巿氣氛.

22/1 年廿九 :

跟Claire妹妹吃個TEA, encore了沙田的Mr Steak 的 tea set. Yummy again!
兩位小妹妹很少見面, 但相處很和睦, 大家玩得都幾夾. so happy!

晚上到婆婆家吃團年飯

23/1 年初一 : 拜年日
早上到爺爺嫲嫲家拜年, 見埋準備出發去韓國滑雪的姑媽姑丈表妹.
中午到姑婆家拜年, 呆坐2小時

.
晚上始終谷不出勇氣跟大眾巿民一起迫看花車巡遊, 留守在婆婆家... 但婆婆棄我們而去, 剩下公公和我們呆吃隔夜餸頭餸尾

.
每年年初一都是這樣啊, 得個悶字...

24/1 年初二 :
天陰陰... 因借了車的關係, 想找個遙遠的地方去下, 於是一家三口自己去濕地公園.
今次是第二次到濕地公園, 上次夏日炎炎沒有行過戶外, 怎料今次因寒風颯颯加霧雨, 又未有機會出戶外公園搜集chop印...
第二個失望就是室內展覽館的 "唱歌魚"在維修中... 原本我們著有一半目的~是為這條魚而來... 但今次都做了手工, 襟章, 看了動物movie 和 visit過展覽館, 妍妍還是很exciting的.
今天泊車吾駛排隊, 正! 更做了半年證, 短時間內應該再有機會重臨, 下次再完美地了埋心願吧!

晚上跟去年一樣, 到爸爸姑媽家開年飯, 妍妍表現淡定乖巧, 得到不少親戚讚美, 做了一晚寶長

.
3位表姐弟妹再次開腔表演, 妍妍今年都keep到吾shy, 樂意唱歌比大家聽.

25/1 年初三 :
巿區7度, 新界5度, 加埋下雨, 凍到入心入肺...
馬上取消士多啤梨園活動, 轉戰Rebecca姨家打邊爐.
小寶, Carson 和妍妍再次爭足一天玩具囉...

26/1 年初四 :
開工大吉, 點知媽咪就病左~咽痛,感冒,大傷風...
妍妍終於能安坐家中, 同姐姐去下買餸, 玩下家中玩具來度日.

27/1 年初五 :
媽咪在家休半天, 阿女在家都令媽咪休息吾到, 下午返工了...
妍妍繼續和姐姐在家玩手指... 好彩工人姐姐見好天都自動自覺帶妍妍去公園放電2粒鐘

28/1 年初六 :
媽咪繼續在家休息, 取消了北上深圳拜年的節目, 好想見下從武漢遠度而到深圳的伯伯, 可惜...
過去一星期寒假, 眼見不少小朋友中晒招... 阿女touch wood能安然度過, 爹媽認為是上星期行山的功勞, 要為女keep住good fit, 爸爸單拖帶妍妍到山頂行一圈.
今天是寒假以來首次放晴, 行山只需穿兩件薄衣, 正到暈!! 中途仲幾次遇到龔仁心夫婦, 龔仁心見妍妍摟抱, 仲勉勵妍妍自己行

<- 不過, 點解收吾到佢的大利是呢? 爸爸失策

29/1 年初七 :
媽咪中學同學團拜, 還欠3包胎一家出席, 可惜! 寄望過多兩年, 我們這黨的小朋友大一點, 身體good fit good fit, 我們齊齊整整來團拜!! 好高興今年又添了新成員, welcome兩位可愛BB!

30/1 和 31/1:
準備好心情2月1號上學去
始終... 第一天早上都是沒有給爸媽surprise...妍妍照往常一樣, 假期過後摟計吾肯返學...

聖誕假期12天, 我們去了旅行, 時間過得很快愉快.
這個13天的農曆年假, 沒有planning, 爸媽每天都煩著有什麼事可幹... 不用返工的日子都抽會一節時間到外走一走, 每天一節足以令爸媽疲乏疲乏...
不過妍妍未欣賞爸媽的盡心盡力, 還投訴... 那些主要是大人的gathering活動/團拜/聚餐, 就算有小朋友出席陪佢, 就算是外出足足一整天, 佢都會總結~"今日都無野玩...好悶呀...", "今日都無玩過, 淨係見你的朋友之嘛"等等... <-

下個長假期將會是EASTER, 一共16天, 救命.... 不去旅行的話, 點安排到阿女滿意呢?

2012年1月21日星期六

行花巿 [3歲5個月]

仲有兩次收田啦, 即本盡最後努力, 先去看看塊田

移左苗的沙律菜未見起色, 一般要兩周時間適應, 今次主要去看看車厘茄有無bb出世, 包住啲幼果, 以防雀鳥偷食.

妍妍很喜觀這個熟識的環境, 經常在爸媽忙碌之時, 佢自己周圍走找節目... 八卦下鄰居的收成, 和自行入座聽老師教種菜...

今天妍妍拿著樹枝剪周圍走, 姨姨看見了很緊張, 馬上叫停, 還被"妳吾攞返比媽咪, 我就收左妳把剪!" 於是妍妍喊住跑回田找媽咪...

小小的茄仔, 寄望能趁收田前變熟

睡著的妍妍醒來時我們已在尖沙咀找晚餐吃
十分推介這間位於帝國中心的"住家菜", 午巿套餐$40元包小菜,飯,老火靚湯和湯水, 還要在尖東地帶, 今時今日去邊搵?
不過今次出來才知沒有晚巿套餐, 比正常價錢, 咁就無咁抵啦.

賞一下尖東農曆年燈飾

發現巨大pizza... 好想食噢!

旺角花墟 ~ 行花巿

揀左風車後, 再尋覓其他~~

爸爸都有暫鍋 ~ 韓國泡菜

看上了無聊Angry bird 燈捧

我要影連環angry bird球~~

Happy 行花巿 Family

第一次同妍妍行花巿, 不過昨天行過山, 今天好攰, 求其買兩件小禮品, 同人迫行兩條巷算... 而且阿女樣樣都想買.... 拿拿聲飛的回家透透囉...
妍妍見有途人小朋友攞住好多戰利品, 佢投訴: "點解你地買咁少野比我架?"<-阿女, 我地未試過一次買咁多比你喎...貪得無厭...

2012年1月20日星期五

親子健行(十二) 嘉道理農場 [3歲5個月]

要和最後的"晴天"接觸接觸, 操fit定身體, 準備和寒假搏鬥! 爹娘專程請假帶女去行山-嘉道理農場, 同行的有carson和rebecca姨姨.

第二次來嘉道理農場, 今次是平日, 避免了好似上似咁上吾到shuttle bus

.

行程: 坐園內的shuttle上觀音山, 然後行落山. 中途加插野餐項目!!

shuttle bus 的行程 ~
11:10 開車
11:15 蕨類植物小徑 Fern Walk (10分鐘遊覽時間)
11:30 蘭花谷 Orchid Haven (10分鐘遊覽時間)
11:45 嘉道理兄弟紀念亭 (10分鐘遊覽時間)
12:00 觀音山
開始離團, 野餐, 行落山(約3公里, 我們行了4小時)
17:00 離開農場

參考:
http://www.lcsd.gov.hk/healthy/hiking/b5/road_family2.php
http://www.kfbg.org.hk/wwwroot/images/upload/place_visit/NatureWalks_2010Feb23.pdf