K1面試二 ~ 越級挑戰SC [2歲3個月]

St Catherine一向都是K1大熱, 我地又點會放過這個趁墟的機會?

我們對SC可謂"越級挑戰", 因為媽咪只選英普班, tick了不考慮粵英, 亦只考慮上午班.

今天st.cat面試 4點, 帶埋近期她的最愛"提子乾"一齊赴會.

3:30一落的士見到學校門口排長龍, 大家冒着雨在街上排隊等候內進.
3:45開始進場, 慢慢的排了約30分鐘後, 到達第一個課室. 開始第一關....

第一關[乖乖坐]

課室內有三張細檯, 每張檯有四張小椅子, 老師叫小朋友自己坐定定玩檯上的lego, 所有家長坐埋一邊, 不可陪坐. 老師在旁俾分. 一開始四個小朋友各有各玩. 2分鐘後妍妍旁邊兩個男仔開始爭玩具. 父母都開始加入控制. 而妍妍和對面的女仔就比較定. 因為爸爸一開始就同佢講"妍妍妳自己玩一陣, 走時同老師講bye bye. 妳做到爸爸就請妳食提子乾". 妍妍果然聽話.

但世事邊有咁完美, 5分鐘妍妍開始吾耐煩, 同爸爸講"可以講bye bye未?" 爸爸叫妍妍等多一陣. 好彩老師只留意住兩個男仔.... 
6分鐘妍妍終於有所行動, 自己落地行去第二張空檯玩玩具, 老師同佢講"厘張係其他小朋友玩, 妳去番自己個張檯到玩好吾好?" 妍妍答 "吾好". 爸爸無眼睇.... 老師於是再講一次, 那時有第二批小朋友進場, 趁老師又要處理嗰兩個爭玩具的男仔時, 爸爸就細聲同妍妍講 "妳要吾要提子乾, 我俾夠三粒妳, 妳番埋去自己個位先". 好彩妍妍都聽話番去自己位玩.

10分鐘後終於走得, 老師叫小朋友自己泊番好椅子走得. 所有家長可能覺得厘10分鐘好似10年咁耐, 全部都急急腳拖住小朋友去第二關, 無同老師講bye bye, 係得妍妍一個講 "bye bye老師". 跟住即刻問爸爸攞提子乾...

第二關[見老師]

妍妍同老師say hello後, 老師開始題問, 內容都係個啲....
妳叫乜名? 幾多歲? 邊個同妳黎? <- 妍妍全部答得快又準. 

眼睛係邊到? 妍妍指住自己眼睛.
繼而問"用黎做乜?" 妍妍無反應... <- 哇, 爸媽真係從來無問過妍妍五官的用途...

再問口係邊到?用黎做乜? 妍妍馬上做左個金魚咀出來.
老師都有耐性"咁即係乜野呀?" 妍妍答"食嘢" 

檯面放有兩香蕉&一雀仔相片, 問三張相片哪張吾同? --- 無問題 

再黎就穿珠仔(6粒, 要穿晒)---無問題

講出三個不同顔色的積木後, 配對在相同顔色的咭紙上---無問題.

全程可算順利同快, 老師問爸爸問題, "點解揀厘間學校" "如果同阿女係公園玩, 見到佢同其他小朋友爭執, 如何處理" --- 照答

走時老師送了一塊貼, 妍妍講了 "thank you, 老師". "byebye"同泊埋張椅子.


在等第三關時, 爸爸就守諾言奬勵妍妍食提子乾, 妍妍食完就想玩玩具, 爸爸話"不如妳問吓老師, 俾吾妳玩呀?" 估吾到妍妍真係主動走去問老師? 老師話一陣間去另佢一間房玩, 佢就好乖咁番埋位坐.... 

第三關[普通話面試]

去到另一間課室, 打完招呼後, 老師用普通話問妍妍問題.

乜名---吾答 

妳好啊---吾彩

邊個同妳黎---諗左一陣, 吾出聲 (爸爸用手指住自己, 妍妍用廣東話答"爸爸")

老師攞麵包, 餅干同香蕉出黎, 要妍妍跟住講  --- 妍妍字正腔圓跟得到
老師再要妍妍將三樣嘢遂一俾老師 --- 佢又做到喎.

跟住老師問爸爸點解要讀普英班, 爸爸用 比古天樂更爛的普通話作答.
老師當時的表情是.........打個凸....

最後老師送給妍妍一張貼紙, 又一聲thank you. 之後bye bye老師, 推番張椅子後, 完成今日過三關..全程大約45分鐘.

爸爸話廣東話一part整體還可以, 但普通話一part就同suicide無乜分別...

bye bye SC !!